Ang “Kalamay-Buna” ang pinakamasarap na kalamay na matatagpuan sa Cavite . Nagmula ito sa Bgy. Buna Lejos, Indang, Cavite at kalimitang mabibili sa

mga nagtitinda sa plaza ng bayan ng Indang. Taong 1927 nang unang nagtinda

sa bayan ng Indang ang noo’y 17 taong gulang na si Emiliana Panganiban ng Bgy. Buna Lejos. Mula noon, tatlong klase na ng kalamay ang nakilala ng publiko: “kalamay na pula”,“kalamay na puti” at “kalamay na may niyog”. Ang matamis, malinamnam at makatanggal pustisong mga kalamay na ito ang siyang nagsilbing ikinabubuhay ng mga taga-Buna. Maraming kabataan mula sa Buna Lejos ang nakapagtapos ng pag-aaral dahil sa pagsisikap ng mga magulang nilang magkakalamay. Sa kasalukuyan, may mga magkakalamay pa ring matatagpuan sa plaza ng Indang .

                Sa panahong ito ng globalisasyon, saan kaya patungo ang industriya ng kalamay sa Buna Lejos na kailan man ay hindi naman nasuportahan ng gobyerno? Bilang pagkilala, narito ang aking textula sa “Kalamay-Buna”:

KALAMAY-BUNA

Textula ni Joel C. Malabanan

Ang Kalamay-Buna sa bayan ng Indang

Nakapagpaaral ng hindi mabilang

Datapwat ang mesket, nawaglit sa kamay

Jollibee’y pamalit sa lagkit na taglay

Kung anong linamnam, tamis ng arnibal

Tumab-ang, nagluno ng baliw na asal

Bagong henerasyong nagtapos, nag-aral

Pabrika’t call center ang dasal at usal!

Sudsod at talyasing gamit na panghalo

Sa Bunang Malayo ay naghihingalo

Simot na ang niyog sa mga looban

Kalamay, pagkakuwan, alamat na laang!

Tags: kalamay-buna